Prejentazion de “Fora!” – Escape Room Val de Fascia

L é do a orir “FORA”!, la pruma Escape Room de Fascia, pissèda e metuda en esser fora per chest an 2021 da n grop de joegn fascegn pascioné de scienzes, logica e cambres da sciampèr fora, col didament de la Coprativa sozièla INOUT e del Museo Ladin de Fascia. La “room” la é stata endrezèda te la veia scoles de Dèlba, te na sala metuda a la leta dal Comun de Cianacei, olache l grop de lurier à enjignà l post per l jech: na cambra te chela che i jiadores vegn seré ite e da chela che i cogn fora te 1 ora de temp, ma demò do esser stac bogn de fèr fora endoins e fruzeles. Per jièr no serf aer de gran abilità o cognoscenzes, bèsta aer anteveder, esser ascorc e aer gran gaissa. Se pel jièr da 2 enscin a 6 persones, n grop de amisc e jent fidèda per passèr un’ora de spas e emozions.
Fora per l mond se troa n muie de chesta cambres da sciampèr fora, soraldut te la gran zitèdes. Se trata de na oportunità de devertiment foradeanter, che la é do a se sparpagnèr fora semper de più e la é bona de tor ite e engaissèr jent de vigni età. La Escape Rooms les vegn pissèdes con tematiches prezises, a na vida da portèr dant ambientazions particolères, per tor ite i jiadores te l’esperienza de jech. Te chesta cambres se pel viver l’atmosfera de na perjon, de n ospedèl de mac, de na cèsa con spiric; bendeché les vegn vivèntedes con ambientazions da chino e televjion, desche per ejempie l ciastel de Harry Potter o Game of Thrones. “FORA!” la porta dant l argoment
de la Gran Vera, l event mondièl scombatù ence te Fascia, protagonista di combatimenc a l’auta anter l 1915 e l 1918. Chiò nasc ence la percacenta colaborazion col grop de lurier del Museo Ladin, de gra a chel che l é stat possibol meter a jir n spazie de jech realistich e storicamenter prezis: la Escape Room de Fascia no l é demò na esperienza de jech ma l é ence l met per cognoscer più avisa l teritorie, sia istoria e la jent che l’à scrita. Podessa doentèr na sezion sul teritorie de museo, dalajache l é stat metù ite ence n picol percors espositif che l jiador pel vijitèr dant de jir ite te la room o do aer fenì.
La coprativa INOUT à cherdù e sostegnù chest emportant projet de valorisazion de la idees e di talenc di joegn che se à dat ju per meter a jir “FORA!”. L nef jech l é ence na ocajion per se troèr e per crescer, per fèr rei sul teritorie e l cognoscer miec dal pont de veduda storich e geografich. Les é en muie defat la firmes e la persones che à didà e cherdù te chest projet: Museo Ladin e Comun de Cianacei, desche dit, la ASUC de Poza, Pera e Cianacei che les à donà l legnam, l Liceo Artistich de la Scola Ladina che à metù a la leta i materièi per l alestiment, l’APT de Fascia per la promozion sul teriorie, i bec de l’Escape Room de Gherdena per i consees de projetazion e realisazion. N develpai de cher ai tropes artejegn fascegn che à didà fora i joegn tel lurier de cantier, tel meter a jir i impianc e l sistem de fruzeles e gabolamenc dassen senestres, duc da descorir. N fort develpai ence ai joegn che se à dat ju con gaissa per portèr junfon chest projet con sia idees, proponetes e fineza; con gran struscies i à portà vèlch de valuta per duta la val, vèlch che smaora la gran perferida de proponetes de spas e de enconter outes a la comunità e ai ghesć.
Donca duc i é envié a proèr e a se goder con “FORA!”. Per se prenotèr se cogn jir su www.escapefassa.it, olache se troa ence maora informazions e curiositèdes sul jech. La prejentazion de la neva Escape de Fascia la sarà en vender ai 10 de dezember da mesa les 6 da sera te Museo Ladin (se cogn aer l Super Green Pass). Chesta sarà l’ultima scontrèda de la scomenzadiva J4J – Joegn per la Jent de INOUT: te chesta ocajion l grop de lurier de l’Escape, i operadores de Museo e i joegn de INOUT i ge porterà dant a duta la jent de Fascia l projet a na vida del dut foradeanter, feruscola e con marevees. Ve speton!