Ora in onda

Titolo

Artista

Programma attuale

Dolomiti Revival

12:00 14:00


D’ünsar provintziàl un redjonàl autonomì mocht schaung å hèrta mearar zuar in Euregio

Scritto da il 4 Luglio 2021

Da gåntz Redjóng Trentino-SüdTirol iz hèrta gest an earde boda hatt gehatt oiròpische burtzan. I pin hèrta gest in disan hümbl zo flattra vonar sait aft d’åndra un hån gesek gian vort un khearn bidrùmm sovl laüt ke dar mak njånka gloam. Zèrte håm geredet belesch, zèrte taütsch, zèrte åndre azpe biar, odar ladìn, solàndro un bèrsntòlerisch o. Alle dise laüt håm hèrta gelebet azpe tschelln, seånka azza håm geredet åndre zungen.

I, boda da uantzege zung bode hån hèrta gehöart vo djung aubart iz gest dar vispl vo moinar måmma un vo moin tatta, hån gelirnt ren umbrómm i pin hèrta gånt z’schauga, lugàrt, di sbemmaren vo Lusérn.

Ploaze vo dise soin gånt zo vuaz in di statt zo vorkhóava sbemm un håm geredet belesch. Un biavl månnen un baibar soin gånt in auzlånt z’arbata, redante azpe biar! (Di altn håm hèrta kontàrt ke, an lestn, di österraichar, di schvaitzar un di frantzésan håmse hèrta vorstånt).

I gedenkhmar o di taütschan boda soin khent zo leba atz Lusérn; ettlane soin gest lerer, odar faffan, odar lai månnen un baibar bodase soin boràtet pitt lusérnar. Ditza, in an stroach, iz gest eppaz normàl in da gåntz redjóng boda, in di sèlln djar, iz gest a toal earde gehoazt Tirol.

Biar, trianar un südtirolar, soin hèrta gest vor di Oiròpa. Bar håm hèrta ågeschauget di lentar nåmp üs, azpe tschelln lentar. Sichar, ’z iz nèt gest allz daz peste gian vort vo da, gianante in auzlånt un lazzante da soine laüt. Ma niamat vo dise hatt vorgèzzt soi huamat, soi haus, soi lånt un soi zung. Un zboa provìntzan, azpe da sèll vo Tria un da sèll vo Poatzan, asó ågepuntet fra de se, zoa zo giana vürsnen gianante nå in tritt un dar stòrdja von altn, mochan hevan å zo gloaba mearar in Euregio. Di autonomì mocht khemmen z’soina a prukk bodaz pintet å pittar Oiròpa, gianante zo süacha zo geba mearar bèrt dar Oiroredjóng Tirol-SüdTirol-Trentino.


Opinione dei lettori

Commenta

La tua email non sarà pubblica. Campi obbligatori *



Continua a leggere