Ora in onda

Titolo

Artista


Di arbatn von Kulturinstitut vor in summar

Scritto da il 25 Giugno 2022

Dar Kulturinstitut, azpe alle djar, lekk au kulturàl un edukatìf prodjèkte zo macha khemmen lust in laüt zo lirna un zo macha khennen di zimbarzung untar aniaglana form.

Di khindar von 3 månat afte 6 djar, von 04 von höbiat sin atz 26 von snitt bartn mang gian in Summar Khindargart, a khindargart augelekk auz pan summar gehaltet vonar kooperatìf un pitt zboa laüt, zornìrt von Kulturinstitut Lusérn, boda bartn lirnen di zung in khindar. Dar zil iz dar sèll zo macha höarn in khindar di zimbarzung auz un auz, daz mearaste boma mage asó azzese mang lirnen spilante un machante di sachandarn vo alle tage.

Daz sberarste auzolega disan prodjèkt iz gest vennen di laüt boda ren garècht genumma di zimbarzung. Vennen dise laüt khintz z’soina alle djar sberar un in kau inan tage makz soin azma nemear mage vürgian pinn prodjèkt; hèrta mearar, defatte, menglnda djunge boda khånen ren garècht di zung un boda håm lust zo lirnasen in åndarn durch disan modo.

Zbisnen in månat von höbiat un von snitt, von 25 von höbiat sin az 19 von snitt di khindar von 7 atte 13 djar bartn mang gian in da Zimbar Kolònia, un durchmachan schümmane tang pitt laüt boden nåstian redante di zimbarzung. Di kolònia bart khemmen gemacht au in ex ponte radio boma bart mang nützan in gart auzzalt un di bisan sèmm umenumm zo stiana in di natùr. Di khindar bartn khemmen gevüart ummar zo khenna ’z lånt un darzuar bartnda khemmen augelekk viazan saiz in Provìntz, saiz auz.

Da Ferragosto barta khemmen gemacht an kontzèrt un an kurs zo lirna spiln in schach augelekk pittnåndar pittar unione scacchistica Trentina zo kheara zo vüara ditza spil atz Lusérn asó azpe ’z iz gest vor djar.

Sidar bintsche soindase gerift di kürs zo lirna di zimbarzung stèpfln: base A1 un vür B2. Noün laüt soinse inngeschribet in sèll base un viare in sèll vür. Vorda auz iz ’z djar bartma mang machan di kürs vor di stèpfln A1 un A2 online durchgevüart von laüt von Kulturinstitut Lusérn

Auz di lestn von summar di earstn von herbest, azma bart möng, barta khemmen gemacht a trèff vo skultùrn pitt holtz gehoazt “In hèrtz von holtz” ’z bartnda soin vünf kunstlar boda bartn mochan inn snitzln in an zöll zirm figùrn von stòrdje von zimbarn. Dise figùrn bartn khemmen gelekk auz nå in staige “Nå in tritt von Sambinelo” asó barta soin bidar eppaz naügez zo lazza seng.

Sin di lestn tang von herbestmånat bartma mang inngem in Kulturinstitut di stòrdje zo nemma toal in konkors Tönle Bintarn; bazta iz khent geschribet bart khemmen geschètzt vonar komisiong un di pestn bartn håm soin darkhenn in tage von Lusérnar Boinichtn.

’Z magat auzvalln azta auz pan summar khemmenda gemacht åndre schandarn o.


Opinione dei lettori

Commenta

La tua email non sarà pubblica. Campi obbligatori *



Continua a leggere

Articolo precedente

Sport un djunge