Delegazion ladina ala giaurida dl ann de scola a Grugliasco
Scritto da Red.azione il 20 Settembre 2022
“Duc a scola” – nsci l moto dla giaurida ufiziela tradiziunela dl ann de scola 2022/23 a livel nazionel che se à tenì n vënderdi (ai 16.09) tla scola auta “Curie-Vittorini” a Grugliasco dlongia Torino. A chësta zeremonia fovel prejënc l Presidënt dla Republica y l Minister per l’Istruzion, avisa sciche truepa delegazions de sculeies y sculées da duta la Talia. L à pudù tò pert nce na delegazion ladina cun doi sculeies, na sculea y l nseniant Fabian Fistill, deberieda cun la Intendënta Edith Ploner. Nce Anna Pfitscher dl’Intendënza tudëscia, Marion Karadar, diretëura dla direzion raionela de Eppan y Francesca Quercia dl’Intendënza taliana ie jites tl Piemont per chësta ucajion.
