Concors: #LSegnaliberCheVolesse

TOL PÈRT ENCE TU!
La jent de età ne recorda l’arpejon de valores sozièi deslebeé tel temp: l ferstont, l’amicizia, la prudenza e l fondament del jir pian. I joegn à la forza per tegnir vif dut chest.

L 2021 l’é l’an di festejamenc per i 40 egn de la biblioteca de l’Istitut Cultural Ladin. N an no demò de zelebrazions, ma ence na ocajion unica per se fegurèr e ge dèr vita a na neva idea de cultura ladina, fata de condivijion e interazion con n program rich de ativitèdes dedichèdes a duc e binèdes adum sot l’inom de la emprometuda mia majon, mia storia, mia parlèda.

La scomenzadiva LSegnaliberCheVolesse la nasc per creèr na ocajion de meter a una la pitura e la schertura de età desvalives che se mesceida, generazions che se troa, pontan via da la constatazion che i veies e i bec i stèsc ben ensema e i ge dèsc saor e color a noscia sozietà.

Envion i bec, i joegn e i veies a se contèr. Giaves e nec, amisc o parents, l’obietif l’é chel de creèr zeche da nef olache la paroles sevies de chisc egn les ciapa vita e foja te la forza fegurativa di bec e di joegn; la generazions pea via da chiò a se troèr, a se binèr a una per valorisèr sie esser ladins.

CO FÈR A TOR PÈRT
La partezipazion no costa nia e la scomenzadiva la é averta a bec e a joegn fin de 19 egn e a duta la jent de età.

I bec e i joegn cognarà se fèr dir da n veie na frasa per ladin: n pensier o n dit da zacan (no più che 10 paroles). Chesta paroles les cognarà dò vegnir interpretèdes con n dessegn: collage, colores a èga, lapisc o penarel, no l’é limic, bèsta durèr n sfoi de papier descheche moscia nosc tutorial.

Dessegnes e paroles cognarà do vegnir fotografèdes e manèdes te na bona ressoluzion a la direzion mail biblioteca@istladin.net opura via Whatsapp al numer 0462.764267 dant dai 30/06/2021.

I lurieres, te sia verscion originèla, i cognarà vegnir tegnui su. Tel cajo che i venjessa, i vegnarà domané per i fotografèr danef e i stampèr te na foja profescionèla sui segnalibres de papier.

Duta la fotografies vegnarà publichèdes sul sit www.istladin.net e en condivijion sul grop Te biblioteca de l’Istitut Cultural Ladin e su la piata facebook Istitut Cultural Ladin – Museo Ladin de Fascia.

A partir dai 15/05/2021 e fin ai 30/06/2021 sarà possibol dèr ju la stima per l dessegn e l pensier più bie anter chi publiché su facebook tras la funzion «like». I venjidores ciaparà n pest e duc podarà veder sia operes publichèdes, stampèdes e metudes a la leta de duta la jent con segnalibres, calandères e vèlch autra marevea.