Ora in onda

Titolo

Artista

Programma attuale


Bookstart: Ampliada l’oferta de libri por pici por ladin

Scritto da il 11 Maggio 2022

Bele dal ann 2007 inant él te Südtirol “Bookstart – ai pici ti plejel i libri” por descedé bele da pici insö l’interes ai libri y la ligrëza da lí y da lí dant. Chësta iniziativa dla Agenzia por les families y dles Repartiziuns por la cultura todëscia y taliana por la promoziun dla letöra por viadus y pici cina ai trëi agn s’á svilupé tres deplü ti agn: insciö ciafa i geniturs co anunziëia sü pici tl Ufize anagrafich de so Comun debann le pachet cun les informaziuns “Bëgnodü pice / Bëgnodüda picera” y i pröms dui libri de Bookstart. Le secundo pachet de libri por pici cun dui librins lapró é danman da jí spo a se tó te na biblioteca publica, canche le pice o la picera á 18 mëisc. Te entrami i pachec de libri él da ciafé dlungia a informaziuns en cunt dl lí dant n liber ilustré por todësch y por talian.

Dal mëte man dl ann 2021, ciafa les families che vir tles valades ladines n terzo liber por ladin ti dui idioms de valada scinché lapró. Por amplié l’oferta él gnü fat la traduziun dl liber “Mein erstes Wörterbuch” tl ladin badiot y tl ladin gherdëna en colaboraziun danter l’Agenzia dla Provinzia y l’Union di Ladins de Gherdëina. Porater sarál tl dagní la poscibilité por düc chi che á interes da damané tres so Comun de residënza da ciafé le liber por pici por ladin, ince sce süa residënza ne é nia tles valades ladines. Chësc podess ester dantadöt interessant por zitadins y zitadines de lingaz ladin co ne vir nia ti Comuns dles valades ladines (Corvara, Badia, Mareo, S.Martin de Tor, La Val, S. Cristina, Urtijëi y Sëlva), por porté sü pici che crësc te n contest de lingaz todësch y talian pormez al lingaz ladin.

Sön na plata web aposta dla Provinzia él da ciafé deplü consëis en cunt de libri por ladin por pici leturs y leturies, co vëgn dal Istitut Ladin Micurá de Rü. Deplü informaziuns sön l’iniziativa “Bookstart – ai pici ti plejel i libri” sciöche ince sön consëis nüs vigni mëis en cunt de libri por pici leturs y piceres leturies él da ciafé online sot a www.provinz.bz.it/bookstart. Libri da se impresté fora por pici y gragn él porater da ciafé tles biblioteches de tröc posć te Südtirol o ince sot a https://biblio.bz.it/.


Opinione dei lettori

Commenta

La tua email non sarà pubblica. Campi obbligatori *