Ora in onda

Titolo

Artista

Programma attuale

Aperto di domenica

09:00 12:00


Sègra de Sèn Vile 2021 en recort de Canori, Zerilo Bora e Tinoto Monech

Scritto da il 21 Giugno 2021

Ai 26 de jugn desche zenza vegn festejà ja Moena la sègra de Sèn Vile. Chest an la comunanza de Moena vel recordèr trei fegures, artisć de Moena, leé anter de ic da na gran amicizia. Ogneun te sie setor artistich l’à sapù ge dèr luster a la comunanza.

La giornèda la scomenzarà dadoman prest con l sveiarin di otons de la banda de Moena. Da les 10:00 dadoman la S. Messa ofizièda da don Enrico. A la fin de chesta, vegnarà benedì te cortina na targa a recort del scultor e maester Zerilo dell’Antonio “Bora” . La banda viderà la jent dapò te zenter de Piaz de Sotegrava olache l president de la PAT Maurizio Fugatti ge darà la prestigiousa onorifizenza “Ègua de San Venceslao” a l’organisazion “Marcialonga”, zerimonia compagnèda dal conzert de la Banda de Moena, vidèda dal nef maester Roberto Silvagni. Tel domesdì da les 15:00 vegnarà portà dant na vijita vidèda a la operes del Zerilo e sia scola aló da la gejia de Sèn Vile.

La sègra de Sèn Vile la ge vegn dedichèda al scultor e maester Zerilo dell’Antonio Bora, a cincant’egn da sia mort, apede a etres doi sentadins che se à fat cognoscer te l’ambit artistich e culturèl, Luigi Canori en ocajion del 30eisem an da canche l’é vegnù a mencèr e Valentino dell’Antonio “Tinoto Monech”, gran poet del paìsc de Moena.

Da les 16:30 te sala “Simonin Maza” de la scoles vegnarà prejentà la riedizion amplièda de la regoeta de poejìes “Dò l troi de la speranza” de Tinoto Monech per endrez de l’Union di Ladins de Fascia-Grop Ladin da Moena e la Cassa Rurale Dolomiti.

Tel medemo moment, vegnarà prejentà ence la neva publicazion a cura del Comun de Moena ensema a Union di Ladins de Fascia-Grop Ladin da Moena “Cirillo dell’Antonio Bora e la Scuola d’arte di Moena – documenti e testimonianze”, na publicazion che à l’obietif de onorèr la memoria del scultor e de “sia” Scola d’èrt de Moena, coronament de na vita de empegn, de lurier, studie, ensegnament, gran sodesfazions, ma ence de gran zensures. “Volon recordèr chisc fac no demò per ge sporjer n rengraziament postum al “gran maester” che con empegn l’à onorà nosc paìsc, ma ence per renovèr anter la joena generazions l’enteress e la cognoscenza per n gran e emportant patrimonie uman e artistich che l ne à lascià.

Per endrez del Grop Ladin vegnarà portà dant letures da “Dò l troi de la speranza” e n moment de musega con ousc e piano con toc dal CD del Canori “Ciantie da mont, da spas e sal cör”.


Opinione dei lettori

Commenta

La tua email non sarà pubblica. Campi obbligatori *