Traccia corrente

Titolo

Artista

Show attuale


L’entrada nöia dla Val Badia: la mobilité ciara inant

Scritto da il 11 Aprile 2022

A mët man da insnöt sarà le trafich regolé damí, plü saurí y plü sigü, giulan ala nöia entrata dla Val Badia, inaugurada dal pres. Kompatscher y dal ass. Alfreider, adüm ales autorités di comuns.

Do trëi agn de laurs, insnöt les 18.00, và le coliamënt nü danter la strada statala de Puster y la Val Badia en funziun. Ara se trata de n rondel, de n punt sura la Rienz y de n tunel.

Do la benedisciun dla infrastrotöra da pert de siur Franz Künig, á le presidënt Arno Kompatscher y l’assessur Daniel Alfreider, l’ombolt da San Laurënz Martin Ausserdorfer, l’ombolt da San Martin Giorgio Costabiei, en rapresentanza di comuns dla Val Badia, adüm al injinier progetist Umberto Simone à taié la vëta y daurí ufizialmënter la strada al trafich.

Al se trata de n laur che ti ciara al dagní, y che garantësc na miú cualité de vita.

“Tres chësta entrada ala Val Badia, sunse stá bugn da porté a piz n proiet ponsé y dejidré da cotan d’agn. Al é n’opera che ti dá tröpa segurëza al trafich sön strada” á dit le presidënt Kompatscher, chël che á ince rengrazié l’ex assessur Folrian Mussner por le laur de preparaziun y de scomenciamënt di laurs, che é spo jüs inant sot l’assessorat de Daniel Alfreider. Kompatscher à spo rengrazié dötes les dites y dötes les porsones che á lauré para ala realisaziun dl proiet.

“Giulan a chësta infrastotöra gnará döt le trafich por y dala Val Badia gestí trö’ damí, y ince le transit söla statala de Puster ciafarà na bona alisiraziun. I residënc dles fraziuns de San Laurënz ará zënz’ater na miú cualité de vita.” Chëstes les parores dl assessur Alfreider.

L’obietif dla Provinzia é sambëgn chël da alisiré le trafich söles strades, dandaüt cun l’aumënt dl sorvisc publich – spezialmënter tres la ferata y les corieres – mo ince cun l’invit da adoré la roda y da jí a pe.

Le trafich miliorëia te deplü posć

“Döta nosta comunité á aspeté dî alalungia che chësta entrada gniss realisada. Incö podunse dí che chësc punt y chësc tunel é de nüsc zitadins” á dit l’ombolt da San Laurënz Lorenz Ausserdorfer. Le trafich vëgn milioré te deplö posć: a San Laurënz, a Pflaurenz, a St. Martin y Aue, y sëgn sperunse che al vëgnes ince fat la strada por les rodes danter Tobl y San Laurënz. L’ombolt á sotrissé che i laurs s’á desfiré fora zëna inzidënc y zënza dificoltés particolares.

L’ombolt da San Martin, Giorgio Costabiei, á dit che ince döta la Val Badia á aspeté ert do chësta bel infrastotöra. “I pendleri, i scorlars, i sciori che vëgn en vacanza: düc chi che transitëia söla strada dla Val Badia s’la conforta, deache an sparagna tëmp, an vá plü sigüsc y plü saurí”.

L’emoziun da lascé jö le punt cun la gru

“La costruziun dla strada nöia n’é nia stada saurida. Al é sté le bur’ tëmp, spo la pandemia, y da inultima ince la mancianza dl material por completé l’opera, mo i un dangnëra ciaré inant cun otimism” á dit l’injinier Umberto Simone, responsabl di laurs. Chël che á spo splighé: “Le punt é lunch 144 metri y pësa 1040 tonelades: ara se trata dl secunt punt de Südtirol, por ci che reverda la lunghëza: da le mët jö él sté bindebo compliché. I un messü fá gní adalerch na gru de 90 metri, la plü alta dla Talia, che é stada buna da alzé sö les föms de aciá y dale fá passé sura ega ia. Al é sté na gran emoziun, y nia ma por nos tecnics. Le tunel é lunch prësc 1 chilometer.

La infrastotöra é gnüda realisada dales dites Strabag AG, Alpenbau GmbH, Moser & CO. GmbH e Geobau GmbH.


Opinione dei lettori

Commenta

La tua email non sarà pubblica. I campi richiesti sono contrassegnati con *