Di khindar von lånt håm gisüacht inn pa maürla
Scritto da Red.azione il 1 Luglio 2021
In madjo, dar månat vodar Madånna, di khindar von lånt håm gisüacht inn pa maürla, augimacht åna zemént, a schümmaz löchle zoa zo macha au a pillele bosa håm gilekk ploaz roasan un a khertzle un datz abas håmsaz ågizüntet un soin gånt zo halta au ’z petle. Anìaglaz khinn hatta gihaltet att soi pillele, umbrómm ’z hattz augimacht zoa zo vorhoaza dar Madånna ke ’z berat khent brevatar!
Alln gevàlltzen aunemmen an matz roasan, ma gedenkhparaz, nèt auzozèrranar kartza vil umbrómm sa soin schümma bosa plüan…’z iz pezzar schaungse å un lazzanse bosa soin, umbrómm di roasan magatn neméar krescharn!
A roas iz hèrta a schümmaz geschénkh, ma velt nia.
