Ora in onda

Titolo

Artista

Programma attuale

#PianoM

14:00 17:00


Bidar dar Festival von djungen von Euregio

Scritto da il 8 Giugno 2021

Von 22 sin atz 25 von herbestmånat, bartze haltn dar Festival von djungen von euregio atz Steinach am Brenner un atz Innsbruck. Haür dar Festival hatt azpe spruch “Aumachan pittnåndar in Euregio”. In gåntzan 35 studjént boda håm von 16 afte 19 djar, bartn mang vorstian pezzar allz bazta ågeat in drai lentar boda pittnåndar machan in Euregio, Tiról, Südtiról un Trentino. Ma bart vairn atz 24 von herbestmånat 2021 atz Innsbruck un disar bart soin a bichtegar momént vodar zente editziong.

Dar Festival von djungen von Euregio hatt an raichan progråmm pitt merare argoméntn: ma bart ren vo bia ma bartze ummar mövarn in di djar boda khemmen, edukatziong, un vürvüarn in Euregio, aftz ditza bartnda drauren laüt bodasen drinndarkhennen, darzuar bartma mang mang gian z’sega in Planét von Stöll Bbt vo Steinach am Brenner un daz naüge Åmt vor Informatziong un Koordinament von Euregio atz Innsbruck. Dar hauppunkt von Festival soinz sichar di naüng tschelln boden machan di djungen von drai lentar von Euregio.

“Haür o dar festival von Djungen von Euregio gitt zuar in djungen zo maga lem schümmane tang pittnåndar pitt laüt boda håm di gelaichegen idee, boda khemmen von drai lentar – khütta dar Kapitå von Tiról Günther Platter – in dise tang mangsa vorstìan pezzar bazta opfart dar Euregio. Ditza iz bichte nèt lai vor di djungen, ma vor di mittarbat zbisnen in drai lentar o”.

“Vor di djungen trentinar o iz an okasiong zo khenna åndre djunge boda khemmen von åndarn zboa lentar un vorstìan pezzar bazta opfart dar Euregio”. Hatta khött dar Vorsitzar vodar Autónome Provìntz vo Tria, Maurizio Fugatti. “Dar Festival von Djungen von Euregio, Tiról, Südtirol un Trentino iz a bichtega plattform boma mage ren un darkhennense. In disa manifestatziong di djungen mang übarleng aftaz sèll bosa tüan un boda mage khemmen getånt un gem naüng vèrt in Euregio sèlbart”. Asó hatta khött dar Vorsitzar vodar Autónome Provìntz vo Poatzan, Arno Kompatscher.

Ma makse innschraim sin atz 14 von prachant affon link: www.euregio.info/festival2021. Zo nemma toal tarftma nicht zaln. ’Z djar 2014 dar festival von djungen von Euregio iz gerift affon zboate platz in earst prais GECT “Building Europe Across Borders” vodar European Uniong. Haür dar gekhennate prodjèkt vor di djungen von Euregio Tiról-Südtirol-Trentino vairt soine zen djar. Dar zil iz dar sèll zo geba mearar vèrt in mittarbatn übar di grentzan un machan bokhennen di djungen von Euregio.


Opinione dei lettori

Commenta

La tua email non sarà pubblica. Campi obbligatori *